اندھیری رات میں نورِ حرا کے ہوتے ہوئے

اندھیری رات میں نورِ حرا کے ہوتے ہوئے

بھٹک رہا ہوں ترے نقشِ پا کے ہوتے ہوئے

کبھی نہ آپ کی سیرت سے کسبِ فیض کیا

میں راہ بھول گیا رہنما کے ہوتے ہوئے

نہ جانے کیسی رکاوٹ کا سامنا ہے مجھے

سفر ادھورے پڑے ہیں دُعا کے ہوتے ہوئے

مرے وجود میں خوابوں کی راکھ اُڑتی ہے

گلاب سوکھ گئے ہیں گھٹا کے ہوتے ہوئے

ہمارے سینوں میں بیمار دل دھڑکتے ہیں

حضورؐ ! آپ کے دستِ شفا کے ہوتے ہوئے

مہیب سائے مسلط ہیں سرحدِ جاں پر

ہم ان سے خوف زدہ ہیں خدا کے ہوتے ہوئے

سروں پہ دھوپ ہے‘ قدموں تلے ہے ریگِ رواں

شکستہ حال ہیں ارض و سما کے ہوتے ہوئے

زبان اسمِ الٰہی کا ورد کرتی ہے

سلگتی ریت پہ جور و جفا کے ہوتے ہوئے