تری یاد وردِ زباں ہوئی تو عجیب رنگ دکھا گئی

تری یاد وردِ زباں ہوئی تو عجیب رنگ دکھا گئی

کبھی اشک آنکھ میں آ گئے ، کبھی لہر دل میں سما گئی

یہ جو ایک شب کا حجاب ہے ، کبھی درمیاں سے ہٹا اِسے

کہ طلوعِ صبح کی آرزو مری کتنی نیندیں اڑا گئی

مرے ذوقِ سجدہ کے سامنے مرا کوئی غم نہ ٹھہر سکا

وہی ایک لمحے کی حاضری مری ہر خلش کو مٹا گئی

مرے گھر سے تیرے مکان تک یہ وہی سنہرے گلاب ہیں

جنھیں آنسوئوں کی بہارِ نو مرے راستے میں بچھا گئی

ترے جاں گداز فشار سے مرے بام و در بھی لرز گئے

تری ایک جنبشِ بے صدا مرے جسم و جاں کو ہلا گئی