وقوعِ حرفِ عدم کو ذرا سمجھ لیجے

وقوعِ حرفِ عدم کو ذرا سمجھ لیجے

سمجھ سکیں تو مرا اِلتوا سمجھ لیجے

اُگا نہیں ہے مگر کھِل رہا ہے فردا میں

جو ہے نہیں، اسے ہوتا ہوا سمجھ لیجے

مری ہنسی کو سمجھ لیجیے ہنسی اپنی

اور اپنے رونے کو رونا مرا سمجھ لیجے

جو بیکرانی سی پھیلی ہوئی ہے عالم میں

اسے ہمارے ہی دل کا خلا سمجھ لیجے

سمجھ لیا ہے اگر معنی لامکانی کا

تو بے گھری کا بھی مطلب ذرا سمجھ لیجے

سخن رقم نہیں ہوتا، روانہ ہوتا ہے

صریرِ خامہ کو بانگِ درا سمجھ لیجے